“Uşaq Forum Teatrı” - İncəsənət əsaslı öyrənmə” layihəsi çərçivəsində təlimlər davam edir - FOTOLAR
“Azərbaycan Uşaqları” İctmai Birliyi (AUİB) tərəfindən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin ayırdığı qrant vəsaiti hesabına həyata keçirilən “Uşaq Forum Teatrı”-İncəsənət əsaslı öyrənmə layihəsi çərçivəsində bu ay ərzində Bakıda uşaqlar üçün Forum Teatr mövzusunda təlimlər təşkil edilib.
Zeferinfo.az xəbər verir ki, AUİB nəzdindəki Uşaq Sığınacağının sakinləri və layihəyə cəlb olunan tələbələr üçün hər qrupda 20 nəfərə 4 günlük Forum Teatr təlimləri keçirilməyə başlanılıb. Ümumiyyətlə 3 qrupda cəmi 60 nəfərin cəlb ediləcəyi bu fəalliyət üzrə ilk qrupu ilə Bakıda təlimlər yekunlaşıb. Təlimçi və ekspert həmin təlimlərdə Forum Teatrın yaranma tarixi, dünya təcrübəsi, əsasları və xüsusiyyətləri, funksional komponentləri, mərhələləri (hazırlıq, fəaliyyət, profilaktik məlumatın ötürülməsi, əks-əlaqə, tamaşanın müzakirəsi), bu növ sosial incəsənətin üstünlüyü (oyun formalı iş, tamaşaçı ilə daimi əlaqə, özünü aktyor kimi hiss etmək imkanı, eksperiment aparmaq, problemin yeni həllini tapmaq və s.) barədə məlumatlar verib, forum tamaşa ideyaları, insanın psixoloji və sosial protreti vasitəsi ilə tamaşalar üçün ssenarinin yazılması, bu cür tamaşaların səhnələşdirilməsi metodlarının tətbiqini öyrədiblər.
Təlim fəaliyyətində qruplarda iş, enercayzerlər, prezentasiyalar, rol oyunları, mövzu üzrə kiçik videoçarxlara baxış və müzakirələr daxil edilib. Məqsəd Forum Teatr texnologiyası ilə tanışıq və dərindən mənimsəməsinin təmini, həmin yeniyetmələri həmyaşıd təlimçilər (peer educators) kimi yetişdirməkdir. Həftə ərzində Bakıda daha 20 nəfərlik 2-ci qrup dinləyicilər üçün eyni mövzuda təlimlər keçiriləcək. Bu ilin avqustunda yekunlaşacaq sözügedən layihənin məqsədi incəsənət əsaslı öyrənmə metodu olan Forum Teatrın tətbiqi ilə əhalinin müxtəlif həssas qruplarıdan olan uşaq və yeniyetmələr arasında yaradıcı mühitin inkişaf etdirilməsi, bu öyrədici “alət”lərdən istifadə ilə sosial problemlərin həllinə dəstək olmaqdır. Layihə icrası müddəti ərzində həmçinin Uşaq Forum Teatr Festivalında nümayiş etdiriləcək tamaşanın məşqləri, Uşaq Forum Teatr Festivalı, Neftçala rayonunda uşaq, yeniyetmə və gənclərdən ibarət qruplara Forum Teatr təlimlərinin təşkili nəzərdə tutulub. Bundan əlavə Forum Teatr tamaşalarından ibarət peşəkar video çəkiliş və montaj, Bakıda və Neftçalada müxtəlif ümumitəhsil məktəbləri, kollec, peşə məktəbləri şagirdləri və universitetlərdəki tələbələr arasında təlimlərdə hazırlanan və Forum Teatr Festivalında nümayiş etdirilən və bir sıra sosial problemlərin özündə əksini tapan Səyyar Forum Teatr tamaşalarının nümayişi göstəriləcək.
