Üç il ərzində səhiyyə sistemində vahid yanaşma olacaq - NAZİR

Paylaşılma tarixi: 06 Noyabr 2025

Uc il erzinde sehiyye sisteminde vahid yanasma olacaq - NAZIR

Hazırda Səhiyyə Nazirliyinin tabeliyində fəaliyyət göstərən Tibbi Müəssisələrin Akkreditasiyası və Keyfiyyətə Nəzarət Mərkəzi bu sahədə sistemli şəkildə fəaliyyət göstərir. İki il ərzində peşəkar cəmiyyətlərlə sıx əməkdaşlıq qurulub və ardıcıl şəkildə protokollar təqdim olunur, müvafiq şura tərəfindən təsdiqlənir. Bu proses beynəlxalq təcrübəyə əsasən illərlə vaxt tələb edir, lakin inanırıq ki, növbəti üç il ərzində vahid standartlar əsasında əsaslı sənəd bazasına sahib olacağıq.

Zeferinfo.az xəbər verir ki, bunu səhiyyə naziri Teymur Musayev parlamentin bir neçə komitəsinin ortaq iclasında “Azərbaycan Respublikasının 2026-cı il dövlət büdcəsi haqqında” qanun layihəsinin müzakirəsi zamanı deyib.
“Eyni zamanda dövlət müəssisələrindəki radioloji və laborator xidmətlərin özəl qurumlarla əməkdaşlıq əsasında təşkilinə dair suallar da verildi. Qeyd etmək istəyirəm ki, Səhiyyə Nazirliyinin tabeliyində olan 9 elmi-tədqiqat institutu daxilində bu xidmətlər həmin müəssisələrin bölmələri tərəfindən həyata keçirilir və əldə olunan gəlir birbaşa həmin institutlara məxsusdur. Bu gəlirlər də əsasən əməkhaqqı əlavələrinin və həkimlərin rifahının təmin edilməsinə yönəlir” - deyə nazir bildirib.

Nazir vurğulayıb ki, vahid yanaşmanın təmin olunması üçün artıq layihə hazırlanaraq aidiyyəti qurumlara göndərilib. Qısa müddətdə bu yanaşmanın tətbiq ediləcəyini və bu sahədəki sualların gündəmdən düşəcəyini düşünürük.