"Talassemiya işi" üzrə təqsirləndirilən şəxslərə cəza istənilib

Zeferinfo.az-ın  məlumatına görə, Bakı Ağır Cinayətlər Məhkəməsində hakim Azad Məcidovun sədrliyi ilə keçirilən prosesdə zərərçəkənlər məhkəməyə mülki iddia ərizələri təqdim ediblər.

Zərərçəkən Mənsur Qarayev Nuridə Seyidova və Aynur Bayramovaya qarşı 25 min 500 manat mülki iddia qaldırıb. Məhkəmə iddianı icraata götürüb.

Daha sonra hakim məhkəmə istintaqının yekunlaşdığını elan edib. Proses çıxışlar mərhələsi ilə davam etdirilib.

Dövlət ittihamçısı təqsirləndirilən Nuridə Seyidovanın 9 il 6 ay müddətə, Aynur Bayramovanın 9 il müddətə, Aysel Məmmədovanın isə 8 il müddətə azadlıqdan məhrum edilməsini istəyib.

Qeyd edək ki, talassemiya xəstələrinin valideynlərinə qarşı dələduzluq edilməsi ilə bağlı daxili işlər orqanlarına məlumat daxil olub.

Məlumat əsasında cinayət işi başlanılıb.

Müəyyən edilib ki, Nuridə Seyidova Aysel Məmmədova və Aynur Bayramova ilə əlbir olaraq 36 nəfər talassemiya xəstəsinin valideynlərinin etibarından sui-istifadə edərək həmin şəxslərin övladlarını Türkiyədə müalicə etdirmək adı ilə 980 min manatlarını mənimsəyib. Əvvəlcə Nuridə Seyidova həbs olunub.

Daha sonra məhkəmə proseslərində Aynur Bayramova və Aysel Məmmədova barəsində həbs qətimkan tədbiri seçilib.

Təqsirləndirilən şəxslərə qarşı Cinayət Məcəlləsinin 178.3.2-ci (dələduzluq, külli miqdarda ziyan vurmaqla) maddəsi ilə ittiham irəli sürülüb.