Keniya Prezidenti: Azərbaycan ilə əlaqələrin möhkəmləndirilməsində maraqlıyıq

Keniya prezidenti Uilyam Ruto Azərbaycan xarici işlər naziri Ceyhun Bayramovu bu ölkəyə rəsmi səfəri çərçivəsində qəbul edib.

Bu barədə Zeferinfo.az  Keniya mediasına istinadən məlumat verir.

Görüş zamanı Keniya lideri Nayrobinin Bakı ilə əlaqələrin möhkəmləndirilməsi və əməkdaşlığın inkişafında maraqlı olduğunu qeyd edib.

Onun sözlərinə görə, Keniya və Azərbaycan arasında münasibətlər Nayrobidə səfirliyin açılması ilə daha da möhkəmlənəcək, çünki diplomatik missiya "iki ölkənin əlaqələrinin çiçəklənməsi üçün təməli möhkəmləndirəcək".

"İki ölkə ticarət və investisiyalar, turizm, yaşıl enerji, mədən sənayesi daxil olmaqla bir sıra sahələrdə əməkdaşlıq imkanlarını araşdırır ki, bu da qarşılıqlı maraq doğurur və hər iki tərəfə fayda gətirəcək", - deyə o bildirib.

Xatırladaq ki, nazir Bayramov Keniyanın paytaxtında rəsmi səfərdədir. Əvvəllər o, keniyalı həmkarı Musaliya Mudavadi ilə danışıqlar aparıb, həmçinin bu ölkədə Azərbaycan səfirliyinin açılış mərasimində iştirak edib.

Əvvəllər bildirilmişdi ki, Azərbaycan naziri Keniya prezidentinə Azərbaycana dövlət səfərinə dəvət təqdim edib.