HP: Daxili borcun artması maliyyə bazarının kifayət qədər inkişafına səbəb olmayıb

Azərbaycanda daxili borcun həcminin artması maliyyə bazarının kifayət qədər inkişafına səbəb olmayıb, lakin büdcə xərclərinin artmasına gətirib çıxarıb.

Zeferinfo.az-ın xəbərinə görə, bu, “Hesablama Palatasının Azərbaycan Respublikasının 2025-ci il dövlət büdcəsi haqqında” qanun layihəsinə rəyində əksini tapıb.

Qeyd edilib ki, daxili dövlət borcu üzrə ödənişlər dövlət büdcəsinin tərkibində 2025-ci il üçün 958 mln. manat (136,8 mln. manat əsas borc və 821,2 mln. manat faiz borcu) proqnozlaşdırılır ki, bu da dövlət borcuna xidmətlə bağlı xərclərin ümumi məbləğinin 39,9%-nə, habelə dövlət büdcəsi gəlirlərinin 2,5%-nə, dövlət büdcəsi xərclərinin isə 2,3%-nə bərabərdir. Bu məbləğ, 2024-cü ilin ilkin proqnozundan 458 mln. manat, yenidən baxılmış məbləğdən isə 787,7 mln. manat çoxdur.

Xərclərin artımının əsas səbəbi iki istiqamətdə özünü göstərir. Birincisi Hökumətin zəmanətli öhdəlikərinin vaxtında icra edilməsi məqsədilə “Aqrarkredit” BOKT-un öhdəliklərinin daxili dövlət borcu kimi təsnifləşdirilməsi və bu öhdəliklər üzrə növbəti il ödənilməli olan 136 mln. manat əsas borc və 13,2 mln. manat faiz borcu ödənişlərinin daxili dövlət borcuna xidmət xərclərində nəzərə alınması, ikincisi isə emissiya edilmiş dövlət istiqrazlarının faiz dərəcələrinin yüksəlməsi ilə əlaqədardır.

Cari ilin ilkin təsdiq edilmiş göstəriciləri ilə müqayisədə 2025-ci il üzrə xarici dövlət borcunun faiz xərcləri 22,9% azalsa da, daxili dövlət borcunun faiz xərcləri 64,2% artmışdır (yenidən baxılmış göstərici ilə müqayisədə 4,8 dəfə) ki, bu da Hesablama Palatasının daxili dövlət borcunun faiz yükünün artımı ilə bağlı etdiyi çağırışların reallaşdığını deməyə əsas verir.