FHN Milli Aviasiya Akademiyasında nümunəvi dərs keçirib

FHN-in Mətbuat xidmətindən Zeferinfo.az-a verilən xəbərə görə, nümunəvi dərs müəllim və tələbələrin fövqəladə hallarla bağlı davranış qaydaları və mülki müdafiə sahəsində biliklərinin artırılmasına, təhsil müəssisələrində baş verə biləcək yanğın və ya partlayış hadisələrinin qarşısının alınması məqsədilə profilaktik tədbirlərin görülməsinə nail olmaq məqsədilə təşkil edilib.

Tədbirdə FHN-in aidiyyəti strukturlarının əməkdaşları, universitetin müəllim və tələbələri iştirak ediblər.

Nümunəvi dərsi giriş sözü ilə açan Milli Aviasiya Akademiyasının “Nəqliyyat texnologiyaları” fakültəsinin dekanı Nazim Nağıyev bu tip maarifləndirici tədbirlərin həm professor-müəllim heyəti, həm də tələbələr üçün mühüm əhəmiyyət daşıdığını vurğulayıb.

Sonra FHN-in Bakı Regional Mərkəzinin rəis müavini Nəcəf Novruzov Azərbaycanda dövlət səviyyəsində əhalinin təhlükəsizliyinə göstərilən diqqətdən, bu yöndə aparılan işlərdən, müxtəlif maarifləndirici-nümunəvi tədbirlərin təşkilinin əhəmiyyətindən danışıb.

Tədbirdə Nazirliyin əməkdaşları tərəfindən mülki müdafiənin əsas prinsipləri, fövqəladə hallar və bununla bağlı davranış qaydaları barədə tədbir iştirakçılarına ümumi məlumat verilib, mövzuya aid fotoslayd və videoçarxlar nümayiş etdirilib.

Tədbirdə iştirakçıları maraqlandıran suallar ətraflı cavablandırılıb.