Siyasi texnoloqlar dövləti sarsıtmaq üçün sınaqdan çıxmış müxtəlif üsullardan istifadə edirlər. Onlar hakimiyyətin monolitliyini pozmaq üçün dövlət məmurlarını ictimai nüfuzdan salmaq taktikasına əl atırlar. Müasir dövrdə bunu həm medianın, həm də sosial şəbəkələrin vasitəsi ilə həyata keçirirlər. “Çamur at, yapışmasa da, yeri qalacaq” prinsipi ilə hərəkət edən bu qüvvələr yenidən Azərbaycanda fəallaşıblar.
Prezident cənab İlham Əliyevin həm daxili, həm də beynəlxalq aləmdəki nüfuzu qarşısında gücsüz olduqlarını anlayan qüvvələr yaxşı başa düşürlər ki, birinci şəxsə qarşı aparacaqları kampaniya ictimai dəstək qazanmayacaq və bu, daha çox onların əleyhinə işləyəcək. Onlar Prezidentin ən yaxın ətrafında, komandasında olan şəxsləri hədəf seçirlər. Hesab edirlər ki, bununla cəmiyyətdə hakim komandaya qarşı inamsızlıq mühütü yarada, hakimiyyətin monolitliyini poza biləcəklər.
Dövlət məmurunun keçmişini təftiş edən, bugünkü fəaliyyətində lupa ilə səhvlər axtaran, faktları təhrif edərək işanların şüuruna yeridən anti-Azərbaycan qüvvələrin buradakı tör-töküntüləri indi də hörmətli Baş nazir Əli Əsədovu hədəf seçiblər.
O Əli Əsədov ki, onun xüsusi təqdimata ehtiyacı yoxdur və o, heç vaxt öz fəaliyyətini reklam etməyib, siyasi şou yaratmayıb. Amma hörmətli Baş nazirimizi hədəf seçənlərə onun kimliyini xatırlatmaqda fayda var.
22 yaşından iqtisadiyyat üzrə müxtəlif elmi və təhsil mərkəzlərində çalışan Əli Əsədov 35 yaşında Bakı Sosial İdarəetmə və Politologiya İnstitutunda dosent daha sonra kafedra müdiri vəzifələrində çalışıb. 1995–2000-ci illərdə Birinci çağırış Azərbaycan Respublikası Milli Məclisinin deputatı seçilib. 1998-ci ildə Azərbaycan Prezidentinin iqtisadi məsələlər üzrə yardımçısı vəzifəsinə təyin edilib. Prezident İlham Əliyevin 10 avqust 2004-cü il tarixli Sərəncamı ilə Əli Əsədova 1-ci dərəcəli dövlət müşaviri dərəcəsi verilib. O, Prezidentin 22 iyun 2012-ci il tarixli 2302 nömrəli Sərəncamı ilə 2-ci dərəcəli “Vətənə xidmətə görə” ordeni ilə təltif edilib. Elə həmin il Əli Əsədov Prezidentinin Administrasiyası rəhbərinin müavini vəzifəsinə təyin edilib. 2019-cu il oktyabrın 8-də isə Milli Məclis Prezidentin təqdimatı əsasında Əli Əsədovun Baş nazir vəzifəsinə təyin edilməsinə razılıq verildi. Həmin gündən cənab Əsədov Baş nazir kimi fəaliyyətini davam etdirir.
Cənab Əsədovun xeyli qısaldılmış tərcümeyi-halından da görünür ki, adam sırf savadına, yorulmaz fəaliyyətinə, sadiqliyinə, vətənpərvərliyinə görə önə çəkilib. Bu günə qədər hörmətli Əsədovun və ya ailə üzvlərinin adının hansısa qruplaşmada, korrupsiya qalmaqalında halandığını eşidən olubmu?
Cənab Prezidentin ən peşəkar, etibarlı kadrlarından olan Əsədova qarşı kompromatlar toplamaq istəyənlərin səyləri boşa çıxıb. Bundan məyus olan təhdidçilər, təxribatçılar təhsilini Bakıda və Moskvada rus dilində alımış Baş nazirin nitqini təftiş etməklə məşğuldurlar. Azərbaycan dilində bəlağətli danışan bəzilərinin yaramaz fəaliyyətinə göz yumanlar nədənsə cənab Əsədovun ölkəmiz üçün etdiklərini görməzlikdən gəlirlər.
Cənab Əsədovun “Prezident İlham Əliyevin rəhbərliyi ilə Rəşadətli Ordumuzun döyüş meydanında qazandığı zəfərlər və Azərbaycanın təşəbbüskarı olduğu sülh Vaşinqtonda, ABŞ prezidentinin iştirakı və imzası ilə rəsmiləşdirildi” ifadəsindən “səhvlər” tapan və bunu bəh-bəhlə sosial şəbəkələrdə paylaşan dostlar nə üçün Baş nazirin 2023-cü ildə Tbilisidə keçirilən 4-cü Beynəlxalq İpək Yolu Forumunda erməni həmkarı Nikol Paşinyana verdiyi cavabı qulaqardı edirlər?
Həmin forumda Əli Əsədov çıxış edərək bildirdi ki, Azərbaycanın bir qonşusundan başqa digərləri ilə çox gözəl iqtisadi və ticarət əlaqələri var: “Nikol Paşinyana demək istəyirəm ki, Azərbaycan İkinci Qarabağ müharibəsindən dərhal sonra sülh müqaviləsinin imzalanması haqda öz mövqeyini bildirmişdi. Azərbaycan 2020-ci il 10 noyabr tarixində imzalanan bəyanata əsasən, kommunikasiyaların açılması istiqamətində uzun müddət çalışıb və öz mövqeyini bildirib. Biz kommunikasiyaların açılmasını istəyirik, amma bu tək bizdən asılı deyil. Qarşı tərəf istəyən halda biz buna hazırıq. Digər hallarda bizim kifayət qədər imkanlarımız var”.
Hörmətli Əli Əsədovun Baş nazir kimi fəaliyyətini, gördüyü işləri, etdiyi səfərləri, imzaladığı qərarları yazmaq, sadalamaq niyyətindən uzağıq. Bir neçə kitaba sığacaq fəaliyyəti bir məqalədə göstərmək praktiki cəhətdən mümkün də deyil.
Azərbaycanın Baş nazirinə qarşı qarayaxma kampaniyası aparan dostlara və qeyri-dostlara cənab Prezident İlham Əliyevin çıxışından bir mesajı, xəbərdarlığı çatdırmaq istəyirəm.
“O da həqiqətdir ki, bəzən hansısa şəxsi zəmində dövlət məmurlarına qarşı əsassız ittihamlar irəli sürülür. Xüsusilə özünü müxalifət adlandıran antimilli və tamamilə rəzil olmuş qorxaq dəstə bu işlərdə ön sıralardadır. Çünki onların əlindən heç nə gəlmir. Onların işi ancaq qarayaxma kampaniyaları aparmaq və bizim işimizə maneçilik törətməyə cəhd göstərməkdir. Ancaq tarix və həqiqət onu göstərir ki, ayağımıza dolaşmaq istəyən bu antimilli qorxaq dəstə bizim işimizə zərrə qədər ziyan vura bilməz. İndi onlar ancaq sosial şəbəkələrdən, bəzi internet resurslarından istifadə edərək dövlət məmurlarına qarşı qarayaxma kampaniyası aparırlar”.
Odur ki, cənab Əli Əsədova qarşı iyrəc kampaniyanın sifarişçilərinə, təşkilatçılarına və icraçılarına səslənirəm. “Özünü müxalifət adlandıran antimilli və tamamilə rəzil olmuş qorxaq dəstə”nin üzvü olmaq istəmirsinizsə, nə qədər gec deyil, bu kampaniyadan əl çəkin. Böhtanlarınız nəinki cənab Əsədovu gözdən salmayacaq, əksinə ona olan etibarı, inamı daha da artıracaq. Necə deyərlər, yel qayadan ancaq toz apara bilər. Sizsə hakimiyyətin qayadan da möhkəm monolit komandasını nəinki laxlatmaq, heç ona toxunmaq gücündə deyilsiniz.
Nahid Canbaxışlı: Vətəninfo.az İnformasiya Agentliyinin Baş redaktoru