Ədliyyə naziri İraq Federal Ali Məhkəməsinin sədri ilə görüşüb

Paylaşılma tarixi: 16 İyul 2025
Edliyye naziri Iraq Federal Ali Mehkemesinin sedri ile gorusub
Ədliyyə naziri Fərid Əhmədov ölkəmizdə səfərdə olan İraq Respublikası Federal Ali Məhkəməsinin sədri Munther İbrahim Hüsseynin rəhbərlik etdiyi nümayəndə heyəti ilə görüşüb.

Zeferinfo.az xəbər verir ki, görüşdə Azərbaycan və İraqın müxtəlif beynəlxalq təsisatlarda hər zaman həmrəylik nümayiş etdirdiyi, qarşılıqlı səfərlərin və görüşlərin ikitərəfli əməkdaşlığın inkişafına töhfə verdiyi qeyd olunub.

Fərid Əhmədov hər iki xalqı oxşar tarix, ortaq din və digər mənəvi tellərin bağladığını vurğulayaraq bu səfərin dövlətlərimiz arasında əlaqələrin, xüsusilə hüquqi əməkdaşlığın inkişafına əlavə təkan verəcəyini bildirib. Nazir qeyd edib ki, ölkələrimiz arasında hüquqi sahədə əlaqələrin inkişafı üçün geniş imkanlar var.

Munther İbrahim Hüsseyn səmimi qəbula görə öz minnətdarlığını bildirərək qarşılıqlı səfərlərin ölkələr arasında məhkəmə və ədliyyə sahəsində əməkdaşlığın genişlənməsinə təkan verdiyini, hüquqi sahədə əldə olunan irəliləyişləri, eləcə də belə səfərlərin qarşılıqlı təcrübələrin öyrənilməsində vacibliyini qeyd edib.

Görüşdə, həmçinin tərəflər arasında qarşılıqlı maraq doğuran digər məsələlər ətrafında fikir mübadiləsi aparılıb.