Beynəlxalq Qızıl Xaç Komitəsinin (BQXK) nümayəndə heyəti Azərbaycan hakimiyyətinin tələbi ilə sentyabrın 3-də Bakıdakı ofisini bağlayacaq.
Zeferinfo.az xəbər verir ki, bu barədə BQXK-nın Ermənistandakı nümayəndə heyətinin rəhbəri Dafne Mare jurnalistlərlə keçirdiyi brifinqdə bildirib.
"Bəli, təəssüf ki, biz sentyabrın 3-də hakimiyyətin tələbi ilə Bakıdakı nümayəndə heyətimizi bağlamalı olacağıq. Bu o demək deyil ki, Azərbaycan hakimiyyəti ilə bir daha heç vaxt müzakirələr aparmayacağıq. Hələ işləmək üçün yeni imkanlar ola bilər", - Mare qeyd edib.
Onun sözlərinə görə, ötən illər və onilliklər ərzində görülən işlər unudulmayacaq: "İndi həlledici məqam həm də mümkün sülh sazişinin imzalanması ilə bağlıdır. Layihədə itkin düşmüş şəxslərlə bağlı beynəlxalq təşkilatla daimi iş və koordinasiyanın aparılacağı bildirilir. Amma bu, o demək deyil ki, biz Bakı ilə əlaqə saxlamayacağıq. Biz neytral qalmağa və bir sıra məsələlərdə vasitəçilik rolumuzu təklif etməyə davam edəcəyik".