Bakıda Valideyn konfranslarına start verilib
Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil müəssisələri üzrə valideyn konfransları başlayıb.
Valideyn konfransları çərçivəsində ilk görüş Nərimanov rayonu üzrə 200 nömrəli Məktəb-lisey kompleksində (MLK) təşkil olunub.
Konfransda Elm və Təhsil Nazirliyinin Uşaqların Müdafiəsi İdarəsinin rəis müavini Günel Səfərova, BŞTİ-nin Media və ictimaiyyətlə əlaqələr sektorunun müdiri Bəşarət Məmmədov, müəllimlər, psixoloqlar və valideynlər iştirak ediblər.
Konfrans iştirakçılarını salamlayan MLK-nın direktoru vəzifəsini müvəqqəti icra edən Tural Hətəmov valideynlərin təhsil prosesində fəal iştirakının əhəmiyyətini vurğulayaraq belə tədbirlərin məktəb-ailə əməkdaşlığına müsbət təsir göstərəcəyinə ümidvar olduğunu bildirib.
Elm və Təhsil Nazirliyinin Uşaqların Müdafiəsi İdarəsinin rəis müavini Günel Səfərova valideynlərin məktəb həyatında, təhsil ocaqlarının idarəolunması prosesində fəal iştirakının əhəmiyyətindən danışıb, məktəb və ailə əməkdaşlığının uşaqların sağlam inkişafında başlıca şərt olduğunu bildirib. G.Səfərova valideynləri övladları ilə daha çox vaxt keçirməyə, onların hisslərinə həssas yanaşmağa və problemləri vaxtında görməyə çağırıb.
BŞTİ-nin Media və ictimaiyyətlə əlaqələr sektorunun müdiri Bəşarət Məmmədov təhsil prosesinin uğurla həyata keçirilməsində valideynlərin iştirakının əhəmiyyətindən söz açıb. Bildirib ki, onların hər zaman məktəbin və müəlimin yanında olması, məktəbin fəal təəssübkeşi kimi çıxış etməsi cəmiyyətdə təhsilə göstərilən dəyərin artmasına, məktəbin nüfuzunun yüksəlməsinə xidmət edir. B.Məmmədov, həmçinin bir sıra valideyn təşəbbüslərinin neqativ müzakirələrə səbəb olmaması üçün bu proseslərin sağlam şəkildə tənzimlənməsinin vacibliyindən bəhs edib.
“Uşaqların psixoloji və emosional inkişafı” mövzusunda təqdimatla çıxış edən 200 nömrəli Məktəb-lisey kompleksinin psixoloqu Günel Paşayeva uşaqların psixoloji və emosional inkişafında ailə münasibətlərinin, sevgi və diqqətin böyük rol oynadığını söyləyib. Uşaqların hisslərini düzgün ifadə etməsinin onların gələcək davranış və özünəinamına ciddi təsir etdiyini bildirən psixoloq, həmçinin vaxtın düzgün tənzimlənməsi, sosial şəbəkələrin təsirləri, həmyaşıdlarla münasibətlər və münaqişələrin həlli kimi gündəlik həyatda valideynləri narahat edən mövzulara da toxunub.
Daha sonra mövzu ilə bağlı iştirakçılarla qarşılıqlı fikir mübadiləsi aparılıb, valideynlərin təklif və rəyləri dinlənilib, sualları cavablandırılıb.
Qeyd edək ki, konfransın keçirilməsində əsas məqsəd məktəb-icma əməkdaşlığını gücləndirməklə uşağın hərtərəfli inkişafını təmin etmək, həmçinin təlim-tərbiyə prosesində valideynin iştirakının davamlı, sistemli və məqsədyönlü şəkildə təşviq olunmasından ibarətdir.
Valideyn konfranslarının paytaxtın bütün inzibati rayonları üzrə təşkil olunması nəzərdə tutulur.
