Azərbaycan nümayəndə heyəti EMİTT 2026 çərçivəsində VİP Hosted Buyer B2B tədbirində uğurla təmsil olundu

Azərbaycan nümayəndə heyəti EMİTT 2026 çərçivəsində VİP Hosted Buyer B2B tədbirində uğurla təmsil olundu.

İstanbul, 2026 — Dünyanın aparıcı turizm sərgilərindən biri olan EMİTT 2026 Beynəlxalq Turizm Sərgisi çərçivəsində Azərbaycan Sağlamlıq və Termal Turizmə Dəstək Assosiasiyası və Skal International Baku Club üzvləri TRAVELSHOP Turkey şirkətinin təşkilatçılığı ilə keçirilən VİP Hosted Buyer B2B tədbirində böyük nümayəndə heyəti ilə iştirak ediblər.

Tədbir çərçivəsində Azərbaycan nümayəndə heyəti beynəlxalq turizm bazarının aparıcı oyunçuları, turizm agentlikləri, tur operatorları, otel şəbəkələri və səhiyyə–wellness turizmi üzrə ixtisaslaşmış şirkətlərlə ikitərəfli görüşlər keçirib. Görüşlər zamanı ölkəmizin sağlamlıq, termal, tibbi və wellness turizmi potensialı, mövcud infrastruktur və gələcək əməkdaşlıq imkanları ətrafında geniş müzakirələr aparılıb.

VİP Hosted Buyer B2B formatı Azərbaycan turizm brendinin beynəlxalq platformada daha effektiv tanıdılmasına, yeni tərəfdaşlıqların qurulmasına və konkret əməkdaşlıq razılaşmalarının əsasının qoyulmasına mühüm töhfə verib. Tədbir iştirakçıları Azərbaycanı sağlamlıq və termal turizm sahəsində regionun perspektivli istiqamətlərindən biri kimi yüksək qiymətləndiriblər.

Azərbaycan Sağlamlıq və Termal Turizmə Dəstək Assosiasiyası və Skal International Baku Club rəhbərliyi bu cür beynəlxalq platformalarda fəal iştirakı ölkəmizin turizm strategiyasının vacib tərkib hissəsi hesab edir və gələcəkdə də beynəlxalq əməkdaşlıqların genişləndirilməsi istiqamətində fəaliyyətini davam etdirəcəyini bildirib.

EMİTT 2026 sərgisi çərçivəsində əldə olunan bu nailiyyətlər Azərbaycanın turizm sektorunun beynəlxalq arenada mövqeyinin daha da möhkəmlənməsinə xidmət edir.